Muri iki gitondo cyo kuwa 20 werurwe 2026 abaislam ku isi no mu Rwanda by’umwihariko bizihije iraidi yo gusoza igisibo cy’ukwezi gutagatifu kwa Ramadhan aho biyirije iminsi 30 yuzuye y’uko kwezi kwa cyenda mu mwaka wabo wa 1447H.
Abayisilamu barenga ibihumbi 30 bateraniye kuri Kigali Pelé Stadium mu gitondo cyo kwizihiza Eid al-Fitr, umunsi mukuru usoza ukwezi gutagatifu kwa Ramadan. Iri sengesho ryitabiriwe n’abayisilamu baturutse mu bice bitandukanye by’Umujyi wa Kigali no mu nkengero zawo, barangwaga n’ibyishimo n’ishimwe ku bwo kugera ku musozo w’igisibo.
Isengesho rya Eid al-Fitr ni kimwe mu bikorwa by’ingenzi mu myemerere ya Islam, aho abayisilamu bahurira hamwe bagashimira Imana yabahaye imbaraga zo kwihangana no kubahiriza amabwiriza y’igisibo mu gihe cy’ukwezi kose.
Imiryango itishoboye yafashijwe binyuze muri gahunda ya Zakat al-Fitr. Mu gihe cyose cya Ramadan, ibikorwa by’urukundo n’ubufasha ku batishoboye byaragaragaye hirya no hino mu gihugu. Mu Mujyi wa Kigali by’umwihariko, imiryango igera ku bihumbi bine itishoboye yashyikirijwe amafunguro n’ibindi bikoresho by’ibanze binyuze muri gahunda ya Zakat al-Fitr.
Iyi gahunda igamije gufasha imiryango ifite ubushobozi buke kugira ngo na yo ibashe kwizihiza Eid mu byishimo, ntawe usigaye inyuma. Abayisilamu bafite ubushobozi basabwa gutanga Zakat al-Fitr mbere y’isengesho rya Eid, nk’uko biteganywa n’amategeko ya Islam.
Abahawe ubu bufasha bagaragaje ko bwabafashije cyane, by’umwihariko mu kubona amafunguro yo ku munsi mukuru no kugabanya ibibazo by’imibereho mu gihe cy’iminsi mikuru.
Mu butumwa yagejeje ku bitabiriye iri sengesho, Mufti w’u Rwanda yashimangiye ko Ramadan atari igihe cyo gukora ibyiza gusa mu gihe gito, ahubwo ari ishuri ry’imyitwarire igomba gukomeza no mu yandi mezi y’umwaka bityo asaba Abasilamu gukomeza ibikorwa byiza byaranze Ramadan.
Yagize ati: “Abayisilamu bagomba gukomeza kurangwa n’umuco wo gusenga, gufasha abatishoboye, kwirinda ibibi no kubana neza n’abandi mu muryango nyarwanda”. Yibukije ko indangagaciro zagaragaye mu gihe cya Ramadan zigomba kuba umusingi w’ubuzima bwa buri munsi.
Abayisilamu basabwe gukomeza gusiba iminsi itandatu ya Shawwal
Mu rwego rwo guherekeza ukwezi gutagatifu, Mufti yanibukije abayisilamu akamaro ko gukomeza kwegera Imana na nyuma ya Ramadan, abasaba gusiba iminsi itandatu yo mu kwezi kwa Shawwal. Mu myemerere ya Islam, gusiba iyi minsi bifatwa nk’ufunze umwaka wose, kubera ingororano nyinshi byitirirwa mu nyigisho z’intumwa Muhammad (amahoro n’imigisha bimubeho).
Ibi byafashwe nk’ubutumwa bwo gukomeza guharanira kwezwa no gukomeza inzira y’amasengesho n’imigenzo myiza, aho abayisilamu basabwa kudasubira mu myitwarire mibi nyuma yo gusoza igisibo.
Usibye ibikorwa by’amasengesho, umunsi wa Eid al-Fitr ngo uyu munsi ugomba kurangwa n’ubusabane hagati y’imiryango, gusurana no gusangira amafunguro. Abayisilamu benshi bagaragaje ko uyu munsi ubabera umwanya wo gushimangira ubumwe, gukemura amakimbirane no kongera kubaka imibanire myiza mu muryango no mu baturanyi.
Ibirori byabereye mu ituze no mu mutekano, bikaba byarafashijwe n’inzego zitandukanye zirimo iz’umutekano n’abayobozi b’umuryango w’Abayisilamu mu Rwanda, bagize uruhare mu gutegura no gutuma ibirori bigenda neza.
Sheikh Omar Suleiman
