Mu rwego rwo kurebera hamwe uko ibikorwa by’Idini n’iterambere ry’umuryango w’Abayisilamu mu Rwanda bihagaze, ubuyobozi bw’Umuryango w’Abayisilamu mu Rwanda, Rwanda Muslim Community (RMC), wasoje inama isanzwe ya Multaqa yabereye muri Kigali Serena Hotel.

Iyi nama yahuje abasaga 130 barimo abayobozi ba RMC, abahagarariye ibyiciro bitandukanye by’Abayisilamu, abafatanyabikorwa, ndetse n’abikorera ku giti cyabo bakorana bya hafi n’umuryango w’Abayisilamu mu Rwanda.

Muri iyi nama, ubuyobozi bw’Umuryango w’Abasilamu mu Rwanda (RMC) bwamurikiye abitabiriye iyi nama ibikorwa by’ingenzi byagezweho mu gihe cyashize, byubakiye ku nkingi esheshatu ziganjemo ubuzima bw’umuryango w’Abayisilamu mu Rwanda.

Inkingi esheshatu zibanzweho:

1. Gukomeza kubaka ubumwe bw’Abayisilamu, hagamijwe gushimangira ubufatanye n’ubwuzuzanye mu muryango n’inzego zitandukanye.
2. Kunoza imiyoborere myiza, no kubaka umuryango ufite ubushobozi bwo kuyobora ibikorwa byawo neza, gukorera mu mucyo no kwemera kubazwa inshingano.
3. Kubungabunga ibyagezweho no kurangiza imishinga yari yaratangiye kugira ngo igere ku ntego zayo, ndetse no gutekereza mu cyerekezo cy’iterambere rirambye
4. Guteza imbere ivugabutumwa n’imigenzo y’idini, hagamijwe gukomeza kwimakaza indangagaciro za Islam mu muryango nyarwanda, gutegura abigisha no gusakaza ubutumwa bwa Islam mu Rwanda.
5. Guteza imbere imibereho myiza n’ubukungu binyuze mu bikorwa biteza imbere iterambere ry’Abayisilamu, bibanda ku burezi, ubuzima n’ibikorwa by’imibereho myiza
6. Guteza imbere ububanyi n’amahanga, hagamijwe gushimangira imikoranire n’indi miryango mpuzamahanga.

Muri iyi Multaqa hafatiwe imyanzuro mishya

Mu myanzuro yafatiwe muri iyi nama, hasabwe ko imisigiti yujuje ibisabwa itarafungurwa yasabirwa gutangira gukora kandi umushinga wo gutegura aba Imam nawo ugashyirwamo imbaranga. Hemejwe kandi ko Imisigiti idashobora kuzuza ibisabwa, mubushishozi bwimbitse hagatekerezwa kucyakorwa.

Hanagarutswe ku mushinga wo kubaka Umusigiti uri ku Ruyenzi mu karere ka Kamonyi wari umaze igihe waradindiye, ubu ukaba ari wo ugiye kwerekezwaho amaboko rusange (umuganda w’abaislam).

Nyuma yo kungurana ibitekerezo no gufata imyanzuro itandukanye igamije guteza imbere umuryango w’Abayisilamu mu Rwanda, abitabiriye inama basoje ibikorwa byayo basangira Ifṭar, igikorwa gisanzwe kiranga ukwezi gutagatifu kwa Ramadhan. Byabaye umwanya wo gukomeza gusangira ubumwe n’ubuvandimwe no kumenyana. Umwe mu bitabiriye iyi Multaqa yagaragarije amatangamutima yo kwishimira iyi nama y’ihuriro, ngo biba ari n’umwanya mwiza wo guhura n’abandi bayobozi n’abaislam bo mu bice bitandukanye by’igihugu.

Iyi nama ya Multaqa igaragazwa nk’intambwe ikomeye mu gukomeza kunoza imiyoborere, guteza imbere ibikorwa by’idini, no gushyigikira iterambere rirambye ry’umuryango w’Abayisilamu mu Rwanda.

Sheikh Omar S. Iyakaremye